ნაგატო წარმოშობით ამეგაკურედანაა. ბავშვობაში, მისგან მალულად, მადარა უჩიჰა მას თავის რინეგანს გადაუნერგავს. მეორე მსოფლიო ომის მიმდინარეობისას, ნაგატოს სახლში კონოჰას ორი შინობი საჭმლის საშოვნელად შეიჭრება. ოჯახი სახლიდან გაპარვას ვერ შეძლებს. შვილის გადარჩენის მიზნით, ნაგატოს მშობლები მტერს პირველები შეუტევენ. კონოჰელები სიბნელეში მათ მტრის შინობებად აღიქვამენ და ორივეს ნაგატოს თვალწინ დახოცავენ. მხოლოდ ამის შემდეგ გააცნობიერებენ ისინი შეცდომას და ნაგატოს მოუბოდიშებენ. ნარუტოსთან საუბარში ნაგატო განაცხადებს, რომ იმ წუთას განცდილი ტკივილი მასში ბრმა სიძულვილად გარდაიქმნა, რამაც გაუცნობიერებლად დაახოცვინა მკვლელები. თავისი დოძიუცუს გააქტიურებას ნაგატო სწორედ ამ ტკივილს უკავშირებდა, რასაც იგი თავისი ცხოვრების პირველ უდიდეს ტკივილს უწოდებდა.
მშობლების დაკრძალვის შემდეგ, ნაგატო საჭმლის სათხოვნელად კარდაკარ იწყებს სიარულს, თუმცა უშედეგოდ. მისთვის საჭმელს არავინ გაიმეტებს. შიმშილისგან დაუძლურებული ბიჭი მიწაზე დაეცემა და გონებას დაკარგავს. სიკვდილს მას ძაღლი გადაარჩენს, რომელიც ნაგატოს ალოვაკს და მოასულიერებს. ეს ძაღლი მისი მუდმივი თანამგზავრი და მეგობარი გახდება. ნაგატო მას ჩიბის დაარქმევს. მისი თქმით, იგი ძილშივე დაიღუპებოდა, ჩიბი რომ არ გამოჩენილიყო.

მოგვიანებით, ღონემიხდილ ნაგატოს ფეხებში კვლავინდებურად გამოეცლება ძალა და მიწაზე დაეცემა. სასიკვდილოდ განწირულ ბიჭს მოულოდნელად თანატოლი გოგონა, კონანი წაადგება თავს, რომელიც მას ღიმილით პურს გაუწვდის. ნაგატო პურს შუაზე გატეხს და მის ერთ ნახევარს ასევე უკიდურესად დამშეულ ჩიბის აჭმევს. დანაყრების შემდეგ, ნაგატოსა და ჩიბის კონანი თავშესაფარში იაჰიკოსთან შესახვედრად წაიყვანს. ნაგატოს მსგავსად, კონანისა და იაჰიკოს ოჯახებიც ომმა იმსხვერპლა. თავდაპირველად, იაჰიკოს არ გაუხარდება კიდევ ერთი "გამოსაკვები პირის" გამოჩენა. მიუხედავად ამისა, იგი ნაგატოსა და ჩიბის მიიღებს.

გადარჩენის მიზნით, სამეული საჭმლის ქურდობას დაიწყებს. ამასობაში, ისინი დამეგობრდებიან კიდეც. ნაგატოს განსაკუთრებით იაჰიკოს პიროვნება მოხიბლავს. მისი შეუპოვრობა მასზე დიდ გავლენას მოახდენს. იაჰიკოსა და კონანის ოცნება მსოფლიოს სიძულვილისა და ტკივილისგან გათავისუფლებაზე ნაგატოს ოცნებაც გახდება.

მოგვიანებით, სამეული ამეგაკურეს მმართველ ჰანზოსა და კონოჰას ლეგენდარულ ნინძათა ბრძოლის თვითმხილველი გახდება. მოულოდნელად, ბრძოლის ველიდან გადმოვარდნილი ფეთქებადი კუნაი მათ წინ აფეთქდება და ჩიბის სიცოცხლეს იმსხვერპლებს. მეგობრების ცრემლების შემხედვარე იაჰიკო გადაწყვეტს, რომ ომისთვის ბოლოს მოღების მიზნით იგი ღმერთად უნდა გადაიქცეს. მისი ეს სიტყვები ნაგატოსთვის შთამაგონებელი გახდება.

ნინძიუცუს შესწავლის მიზნით იაჰიკო, ნაგატო და კონანი ჰანზოსთან ბრძოლაში გადარჩენილი შინობების ძებნას წამოიწყებენ. მეტად სახიფათო და დამქანცველი მოგზაურობისას ისინი ორ ცეცხლს შუა მოექცევიან, თუმცა, ნაგატოს დამცავი ველის წყალობით, ისინი აფეთქებას გადაურჩებიან. მიუხედავად ამისა, მათ ფეხქვეშ მიწა გამოეცლებათ და მდინარეში ჩაცვივდებიან.

ხანგრძლივი ძიების შემდეგ სამეული სანინებს მიაგნებს. თავდაპირველად, მათთან დასალაპარაკებლად იაჰიკო მივა, რომელიც მათ საჭმელს მოსთხოვს, შემდეგ კი იგი თავის მეგობრებს დაუძახებს. ისინი სანინებს საჭმლის მთელ მარაგს შეუჭამენ, შემდეგ კი მათ აედევნებიან. თანაგუნდელებს ოროჩიმარუ ბავშვების დახოცვას თითქოს-და მათდამი სიბრალულის მოტივით შესთავაზებს. ჯირაია მას შეაჩერებს და დროებით სამეულთან დარჩენას გადაწყვეტს.

ერთად ცხოვრებას ისინი ხის პატარა სახლში დაიწყებენ. უზომოდ კეთილი და მზრუნველი ჯირაია მათი ოჯახის ნაწილი მალევე გახდება. კონოჰასადმი არსებული სიძულვილის გამო, ერთადერთი ნაგატო ვერ შეძლებს მის მიღებას. მოგვიანებით, იაჰიკოს თავს იუაგაკურეს შინობი დაესხმება. ნაგატო მას გაუაზრებლად მოკლავს, ბრძოლის ველზე დაგვიანებით მისული ჯირაია კი მის რინეგანს შენიშნავს. ნაგატო მწარედ განიცდის თავის საქციელს, რადგან ადამიანის მოკვლა მას უდიდეს ბოროტებად მიაჩნდა. მძიმე წუთებში მას ჯირაია გაამხნევებს და ეტყვის, რომ ის, რაც მან ჩაიდინა, მეგობრის დასაცავად გააკეთა, რის გამოც მის გაკიცხვას ვერავინ შეძლებდა. იმ წუთიდან ნაგატო თავის სენსეის მთელი გულით მიიღებს, მის უმთავრეს მიზნად კი კონანსა და იაჰიკოზე ზრუნვა და მათი დაცვა იქცევა.

ნაგატოს რინეგანის შემხედვარე ჯირაია ჩათლის, რომ სწორედ იგია „ბავშვი წინასწარმეტყველებიდან“, რომელმაც მსოფლიოში დიდი ცვლილებელი უნდა მოახდინოს. ჯირაია მას ექვსი გზის ბრძენის შესახებ უამბობს და განაცხადებს, რომ ნაგატო მას ბრძენის რეინკარნაციად მიაჩნია.

ერთხელ, შინ დაბრუნებული ნაგატო ჯირაიას ეტყვის, რომ იგი მზადაა ბოლომდე იბრძოლის მშვიდობისთვის, არასდროს დანებდეს და ბოლო მოუღოს სიძულვილის „წყევლას“. მისი სიტყვები ჯირაიას პირველი წიგნის დადააზრად იქცევა, ამიტომ მთავარ გმირად იგი ნაგატოს პიროვნებას შეარჩევს.

ობლებთან სამწლიანი თანაცხოვრების მანძილზე ჯირაია მათ ნინძას ხელობას შეასწავლის. სამალავში იგი ოთხ ცალ ხის პატარა ფირფიტას ჩამოკიდებს, რაც მათ მტრისგან თავდაცვას გაუადვილებთ, და საიდუმლო გასასვლელს გააკეთებს. ერთ დღეს თავშესაფარში დაბრუნებული იაჰიკო, ნაგატო და კონანი ბაყაყის ტანსაცმელში გამოწყობილ ჯირაიას იპოვიან. გაკვეთილის უკეთ ახსნის მიზნით იგი მოსწავლეებსაც თავის მსგავსად შემოსავს, რაც იაჰიკოს აღაშფოთებს.

სამი წლის შემდეგ ჯირაია ობლებს მიატოვებს და სანინებს დაუბრუნდება. წასვლის წინ ნაგატო მას მადლობას გადაუხდის. თავშესაფარში დაბრუნებული ობლები სენსეისგან სამახსოვროდ დატოვებულ მის წიგნს აღმოაჩენენ.

გავა დრო და აკაცუკის შექმნის მიზნით იაჰიკო, ნაგატო და კონანი თავშესაფრის დატოვებას გადაწყვეტენ, წასვლის წინ კი პირობას დადებენ , რომ ერთ დღეს, მათ შორის არსებული მანძილის მიუხედავად, ისინი შინ დაბრუნდებიან და, ჯირაია სენსეისთან ერთად, საქმის წარმატებით შესრულებას იზეიმებენ. გამოსამშვიდობებელი სიტყვების შემდეგ მათ უეცრად თავს დაესხმებიან, თუმცა, ჯირაიას მიერ გაკეთებული საიდუმლო გასასვლელის მეშვეობით, მტერს ისინი ხელიდან დაუსხლტებიან. სავარაუდოდ, ამ პერიოდშივე შეხვდებიან ისინი ზეცუსა და ობიტო უჩიჰას, რომელიც თავს მადარა უჩიჰად გაასაღებს. იგი იდეალურ მსოფლიოზე წამოიწყებს ლაპარაკს, თუმცა იაჰიკო წამიერად გააცნობიერებს მის ზრახვებს და ობიტოს მათთგან მიახლოებასაც კი აუკრძალავს. მიუხედავად ამისა, ნაგატოს დაინტერესებას იგი მაინც შეძლებს და, იაჰიკოსა და კონანისგან მალულად, მას შემდეგი შეხვედრის დროსა და ადგილს დაუნიშნავს.

აკაცუკის ლიდერი იაჰიკო გახდება. ორგანიზაცია თანდთანობით სახელს გაითქვამს. ერთ დღეს დაჭრილ ნაგატოსა და თავის სხვა მეგობრებს იაჰიკო მისიის შესასრულებლად წასვლის უფლებას არ მისცემს და თავად, ასევე დაჭრილი, გაემართება ბრძოლის ველისაკენ. მის შეჩერებას კონანი შეეცდება, თუმცა იაჰიკო მას განუცხადებს, რომ აკაცუკის საგანძურს ნაგატო წარმოადგენს, რადგან იგი მშვიდობისკენ მიმავალი ხიდია, თავად კი ამ ხიდის ერთ-ერთი საყრდენი. ნაგატო კონანს ეტყვის, რომ მშვიდობის ხიდს იაჰიკოს ნებისყოფა წარმოადგენს და, ბრძანების მიუხედავად, აკაცუკის სხვა შინობებთან ერთად, იგი იაჰიკოს დასახმარებლად გაემართება.

აკაცუკის რეპუტაციის ზრდა ჰანზოს შეაშფოთებს და მათ განადგურებას გადაწყვეტს. იგი იაჰიკოს მეგობრობის ხელს გაუწვდის, მომდევნო დღეს კი კონანს გაიტაცებს. გარდა ამისა, ჰანზო კონოჰას ანბუს ლიდერ დანზოს სთხოვს დახმარებას. იგი ნაგატოს კუნაის გადაუგდებს და იაჰიკოს მოუკვას უბრძანებს. დაუმორჩილებლობის შემთხვევაში კი მათ კონანის მოკლვით დაემუქრება. ნაგატო მეგობრების გაწირვას ვერ შეძლებს და, სავარაუდოდ, თავის მოკვლას გადაწყვეტს, რასაც მას იაჰიკო არ დააცდის, რადგან მის კუნაიზე იგი თავადვე წამოეგება. სიკვდილის წინ იგი ნაგატოს ეტყვის, რომ მან და კონანმა უნდა იცოცხლონ და რომ იგი მსოფლიოს გადარჩენას შეძლებს. გავა დრო და ნარუტოსთან საუბრისას იაჰიკოს სიკვდილს ნაგატო თავისი ცხოვრების მეორე უდიდეს ტკივილად მოიხსენიებს.

ჰანზოსა და დანზოს შინობები ნაგატოსკენ უამრავ კუნაის ისვრიან, თუმცა შინრა ტენსეის მეშვეობით იგი ყველა მათგანს მოიგერიებს. ამის შემდეგ ნაგატო მტრისგან კონანს გამოიხსნის, თუმცა ჰანზო მის ფეხებზე უამრავ ფეთქებად იარლიყს მიამაგრებს და ააფეთქებს. ნაგატო კონანს იაჰიკოს გვერდით მოათავსებს, თავად კი გარეთა გზის დემონურ ქანდაკებას გამოიძახებს. მისი მეშვეობით იგი ჰანზოს შინობებსა და დანზოს ანბუს ერთი ხელის მოსმით გაანადგურებს, თავად ჰანზო კი ბრძოლის ველიდან ტელეპორტაციის ტექნიკის მეშვეობით გაიქცევა.

ჩაკრას გადამეტებით მოხმარება ნაგატოს დააუძლურებს, ფეხების დაზიანების გამო კი სიარულს იგი ვეღარასდროს შეძლებს. გარდა ამისა, მის ზურგში დემონური ქანდაკების ლითონის ღეროები სამუდამოდ ჩარჩება.

იაჰიკოს სიკვდილი ნაგატოს პიროვნებას სრულად შეცვლის. იგი ფეინის ექვს გზას შექმნის, თავს კი ღმერთს უწოდებს. დევას გზას იგი იაჰიკოს სხეულისგან შექმნის და მისი ხელებით შეუდგება მსოფლიოში მშვიდობისა და სამართლიანობის დამყარებას. ნაგატო აკაცუკის ლიდერი გახდება და ორგანისაზიას ეს რანგის კრიმინალებით დააკომპლექტებს. გარდა ამისა, იგი ჰანზოს მოკლავს და მთელ მის მოდგმას ამოხოცავს. სიკვდილის წინ ფეინი ჰანზოს განუცხადებს, რომ იგი ნაგავია, რომელიც ვერაფერს ხვდება.

ნაგატო მეოთხე მსოფლიო ომის წამოწყებასა და, ამასთანავე, უძლიერესი "იარაღის" შექმნას გადაწყვეტს, რომლის მეშვეობითაც მთელი ქვეყნის წამიერად განადგურება იქნებოდა შესაძლებელი. ასეთი იარაღის შექმნის მიზნით, აკაცუკის მეშვეობით, იგი ჯინჩურიკების დაჭერასა და კუდიანი ურჩხულების გარეთა გზის დემონურ ქანდაკებაში ჩაბეჭდვას წამოიწყებს.

მოგვიანებით, აკაცუკის ლიდერზე ინფორმაციის მოსაპოვებლად ამეგაკურეში ჯირაია შეიპარება. ხანგრძლივი ბრძოლის შემდეგ, ფეინის ექვსი გზის მეშვეობით ნაგატო მას მოკლავს, მანამდე კი ჯირაია ექვსი გზის ტექნიკებისა და მათი მოქმედების მექანიზმის შესახებ დაშიფრულ ინფორმაციას კონოჰაში გადაგზავნის.

მოგვიანებით, კონანთან ერთად, ფეინი ცხრაკუდიანი ურჩხულის დასაჭერად გაემართება. იგი კონოჰას ბევრ შინობს, მათ შორის კაკაშისაც, მოკლავს. ნარუტოს ადგილმდებარეობის გაგების შემდეგ იგი, ფართომასშტაბიანი შინრა ტენსეის გამოყენებით, კონოჰას მიწის პირისგან აღგვის, რაც სოფლის ადგილას უზარმაზარ კრატერს დატოვებს, მანამდე კი ცუნადეს განუცხადებს, რომ დიდებული ქვეყნები, რომლებიც მშვიდობისთვის ომობდნენ, მშვიდობამ სულელებად აქცია და რომ ნამდვილი ტკივილის შეცნობის გარეშე მშვიდობის დაფასება შეუძლებელია.

კაცუის დახმარებით ცუნადე სოფლის მოსახლეობის დიდი ნაწილის გადარჩენას შეძლებს, რაც მის ჩაკრას ბოლომდე ამოწურავს. მიუხედავად ამისა, იგი ფეინს წინ გადაეღობება და მასთან საბრძოლველად გაემზადება. ამასობაში, ბრძოლის ველზე მიობოკუს მთიდან დაბრუნებული ნარუტო გამოჩნდება. ცუნადეს იგი დასვენებას ურჩევს, თავად კი ფეინის განადგურებას გადაწყვეტს.

გომბეშოების დახმარებით ნარუტო ფეინის ხუთ გზას გაანადგურებს. მიუხედავად ამისა, მას დევა დაამარცხებს და, ჩაკრას მომშლელი მახვილის მეშვეობით, ხელებით მიწაზე მილურსმავს. ნაგატო განაცხადებს, რომ მას მსოფლიოში მშვიდობისა და სამართლიანობის მოტანა სურს. იგი ნარუტოს ეტყვის, რომ კონოჰამ ისევე გაანადგურა თავისი ოჯახი, მეგობრები და სოფელი, როგორც თავად - კონოჰა და რომ საერთო მიზნის მისაღწევად ისინი განსხვავებული გზებით იბრძვიან, რადგან სამართლიანობა ყველას თავისებურად ესმის. მიუხედავად ამისა, ნაგატოს აზრით, მათ შორის დიდი განსხვავება არაა, რადგან ორივე მათგანი მშვიდობის ნიღაბს ამოფარებული შურისძიების მოტივით მოქმედებს. ნაგატო ნარუტოს თავის გეგმას გააცნობს და განაცხადებს, რომ ნამდვილი მშვიდობა არ არსებობს. მისი აზრით, ადამიანები სულელები არიან და რომ მხოლოდ ტკივილის შიში აიძულებთ მათ მშვიდობის დაფასებას, თუმცა, ასეთი მშვიდობა მხოლოდ დროებითი იქნება, რადგან თანდათანობით ადამიანები ტკივილს დაივიწყებენ და მსოფლიოში კვლავინდებურად ომიანობა და სიძულვილი დაისადგურებს, რაც, ნაგატოს აზრით, შინობთა მსოფლიოს მართავს. მისი თქმით, სწორედ ამ დროს გამოიყენებენ ადამიანები მის იარაღს, რაც მათ ტკივილს შეახსენებს და მსოფლიოს დროებით მშვიდობას მოუტანს.

ნაგატოს კითხვაზე, თუ როგორ აპირებს იგი სიძულვილისთვის ბოლოს მოღებას, ნარუტო პასუხს ვერ გასცემს, რის შემდეგაც ნაგატო მისგან ცხრაკუდიანის ჩაკრას ამოცლას შეეცდება, თუმცა მას ჰინატა შეაჩერებს. იგი ფეინს შეებრძოლება, თუმცა დამარცხდება. მეგობრის გადასარჩენად მებრძოლი ჰინატა ერთადერთი შინობი აღმოჩნდება, რომელსაც ფეინი არ მოკლავს, არამედ დაჭრის, რაც მას გონებას დააკარგვინებს.

ჰინატას ვითომდა სიკვდილის ხილვით განცდილი ტკივილი და სიძულვილი ნარუტოში ცხრაკუდიანს ჩაკრას გაააქტიურებს. შედეგად, ფეინის წინაშე დემონი მელიის ექვსკუდიანი ფორმა წარდგება. მის დამარცხებას ფეინი ჩიბაკუ ტენსეის მეშვეობით შეძლებს, თუმცა, მერვე კუდის გამობმის შემდეგ, ურჩხული ქვის სფეროდან თავის დაღწევას მოახერხებს. ამასობაში, მამის, მინატო ნამიკაზეს დამხარებით, ნარუტო სიძულვილს მოთოკავს. მას შემდეგ, რაც ურჩხული გაქრება, ნარუტო დევას დაამარცხებს და ნაგატოსთან დასალაპარაკებლად გაემართება.

პირის-პირ შეხვედრისას ნარუტო ბრძოლავე უარს იტყვის და ნაგატოს მისი ისტორიის მოყოლას მოსთხოვს. ნაგატოს ამბის მოსმენის შემდეგ იგი განაცხადებს, რომ, მის მსგავსად, თვითონაც დიდი ტკივილი აქვს განცდილი. მიუხედავად ამისა, მას ახსოვს თავისი სენსეის წიგნი, სადაც წერია, რომ "წყევლის" დასამსხვრევად შინობმა ყოველგვარ ტკივილს უნდა გაუძლოს. იგი ნაგატოს სიტყვებს გაიმეორებს და განაცხადებს, რომ თავად "ნარუტო", წიგნის მთავარი გმირის სახელი ჰქვია და რომ ყველანაირ ტკივილთან გამკლავებას შეძლებს, რადგან მან დაიჯერა ის, რისიც ნაგატოსა და ჯირაიას სჯეროდათ. ნაგატო გააცნობიერებს, რომ მან არა მხოლოდ თავის მასწავლებელს, არამედ საკუთარ თავსაც უღალატა. მიუხედავად ყველაფრისა, ნარუტოში იგი იმედს დაინახავს და მის სიტყვებს ირწმუნებს. უკანასკნელი ძალებით, ზეციური სიცოცხლის სამსარას ტექნიკის გამოყენებით, იგი კონოჰას ყველა დაღუპულ მკვიდრს გააცოცხლებს, თავად კი, ჯირაიას მსგავსად, ღიმილით მოკვდება.

მეოთხე მსოფლიო ომის დაწყებისთანავე, უწმინდური მსოფლიო რეინკარნაციით ნაგატოს კაბუტო იაკუში გააცოცხლებს და, იტაჩი უჩიჰასთან ერთად, მას ნარუტოსა და კილერ ბის დასაჭერად გაგზავნის. შეხვედრამდე ნაგატო ნარუტოს ჩაკრას ამოიცნობს და, მისივე თქმით, ნოსტალგიური გრძნობა დაეუფლება. ნარუტოს იგი ცხრაკუდიანის დამორჩილებასა და სიძულვილზე გამარჯვებას მიულოცავს, რის შემდეგაც, ედო ტენსეის ძალით, იგი ჯინჩურიკებს შეებრძოლება. ყოველი ტექნიკის შესრულების წინ ნაგატო და იტაჩი მათ მოსალოდნელი საფრთხის შესახებ გააფრთხილებენ და მათი დაძლევის გზებსაც ასწავლიან. ამასობაში, შისუის გენძიუცუს წყალობით იტაჩი ედო ტენსეის თავს დააღწევს. იგი ნაგატოს ამატერასუს ცეცხლში გახვევს, რასაც ეს უკანასკნელი შინრა ტენსეის მეშვეობით გაანეიტრალებს. ამასობაში, კაბუტო ნაგატოს ცნობიერებას დაბლოკავს. იგი ფართომასშტაბიან შინრა ტენსეის გამოიყენებს, შემდეგ კი კილერ ბის ჩაკრას შთანთქავს და სხეულს გაიჯანსაღებს. ექვსი გზის ტექნიკების მეშვეობით ნაგატო ჯინჩურიკებს შეიპყრობს, თუმცა მათ იტაჩი დაიხსნის. ამის შემდეგ, ნაგატო ჩიბაკუ ტენსეის შესრულებას წამოიწყებს, მისი მოწინააღმდეგეები კი, გაერთიანებული ძალებით, გრავიტაციის სფეროს გაანადგურებენ, რის შემდეგაც იტაჩი მას ტოცუკას მახვილით განგმირავს.

შედეგად ნაგატოს ცნობიერება დაუბრუნდება. იგი იტაჩის მოუბოდიშებს, ნარუტოს კი ეტყვის, რომ იგი იქ ბრუნდება, სადაც მას მათი სენსეი უცდის. ჯირაიას იგი ტრილოგიის პირველ ნაწილად მოიხსენიებს, რომელიც, მისი აზრით, უნაკლო იყო. მისი თქმით, მეორე ნაწილმა, რასაც თავად წარმოადგენდა, არ გაამართლა, რის გამოც თავს იგი ნაგავს უწოდებს, ამიტომ ნაგატო მესამე ნაწილს, ნარუტოს სთხოვს, ისეთი კაშკაშა იყოს, რომ ყველას დაავიწყდეს მეორის მარცხი, რის შემდეგაც იტაჩი მას სუსანოში ჩაბეჭდავს.

ბავშვობაში ნაგატო მეტად კეთილი, მგრძნობიარე და გულუბრყვილო იყო. თავის გადარჩენის მიზნით საჭმლის მოპარვას მას სიკვდილი ერჩია. მშობლების დაკარგვით განცდილი ტრავმის გამო ნაგატო იშვიათად იცინოდა. ცხოვრების უმთავრეს მიზანს მისთვის საყვარელ ადამიანებზე ზრუნვა და მათი დაცვა წარმოადგენდა. ადამიანის მოკვლა მას უპატიებელ დანაშაულად მიაჩნდა. გარდა ამისა, იგი მზად იყო მშვიდობისთვის თავდაუზოგავად ებრძოლა და, ყველანაირი ტკივილის მიუხედავად, სიძულვილისა და ომიანობის გაუთავებელი „წყევლისთვის“ მოეღო ბოლო. იაჰიკოს სიკვდილი შემდეგ ნაგატო ცივი და მარტოსული გახდება. იგი მიიჩნევს, რომ „ნამდვილი ტკივილის“ შეცნობის გარეშე მშვიდობის დაფასება შეუძლებელია. ბავშვობის „გულუბრყვილო“ ოცნებაზე ნაგატო უარს იტყვის და ახალ გეგმას შეიმუშავებს. იგი თავს „ღმერთს“ უწოდებს და განაცხადებს, რომ მისი მისია მსოფლიოში მშვიდობისა და სამართლიანობის დამყარებაა. მიზნის მისაღწევად იგი ჯირაიასაც კი მოკლავს. ნაგატოს გულუბრყვილობასა და მის იდეოლოგიას ტობი სათავისოდ გამოიყენებს.
ყველაფრის მიუხედავად, ნაგატო მეგობრობის ფასს არ დაივიწყებს. ნარუტოს დასაცავად მებრძოლი ჰინატა კონოჰას ერთადერთი შინობი აღმოჩნდება, რომელსაც იგი სასიკვდილოდ ვერ გაიმეტებს. ნაგატო აკაცუკიშიც შეეცდება მეგობრული ატმოსფეროს შექმნას. დეიდარას დაღუპვის შემდეგ, აკაცუკის წევრებს იგი მის დატირებას ურჩევს, კისამეს კი ჰიდანისა და კაკუზუსთვის „ზომბი წყვილის“ დაძახების გამო უსაყვედურებს.

ქედმაღლური გამონათქვამების მიუხედავად ნაგატო ასეთი არასდროს ყოფილა. თავის შესაძლებლობებს იგი ზომაზე მეტად არ აფასებდა. გარდა ამისა, მას მოწინააღმდეგის დაფასება შეეძლო. ჯირაიას მოკვლის შემდეგ თავის მასწავლებელს იგი წუთიერი დუმილით მიაგებს პატივს, კაკაშისთან ბრძოლის წინ კი განაცხადებს, რომ მისთვის პატივია ცნობილ „კოპი ნინძასთან“ შეხვედრა.

კონანის, როგორც თავისი ოჯახის უკანასკნელი წევრის მიმართ ნაგატო განსაკუთრებით მოსიყვარულე და მზრუნველი იყო. აკაცუკიდან ერთადერთი კონანი მიმართავდა მას საკუთარი სახელით. ამეგაკურეში იგი მის „ანგელოზად“ იწოდებოდა.

ედო ტენსეით გაცოცხლებული ნაგატო ისეთივეა, როგორიც იაჰიკოს სიკვდილამდე იყო. იგი იხუმრებს კიდეც, რაც ნარუტოს ძლიერ გააკვირვებს და აღნიშნავს, რომ მას არ აკვირვებს ნარუტოს ცხრაკუდიანზე გამარჯვების ფაქტი, რადგან ისიც ჯირაიას მიერაა აღზრდილი.

ნაგატოს უზუმაკის კლანისთვის დამახასიათებელი სწორი, წითელი თმა ჰქონდა, რაც მას ნიკაპამდე სწვდებოდა და ბავშვობაში თვალებს სრულად უფარავდა. ყმაწვილ და ზრდასრულ ნაგატოს თმა მხოლოდ მარჯვენა თვალზე ჰქონდა ჩამოფარებული. გარეთა გზის დემონური ქანდაკების გამოძახების შედეგად ნაგატო უკიდურესად დაუძლურდება. იგი სხეულის კუნთოვან და ცხიმოვან მასას თითქმის სრულად დაკარგავს და ძლიერ გახდება. გარდა ამისა, ზურგში მას ლითონის უამრავი ღერო ჩარჩება. გადაადგილების მიზნით, ნაგატო ექვსფეხიან მექანიკურ მოწყობილობას იყენებდა, საიდანაც ჩაკრას მომშლელი მახვილის გატყორცნა შეეძლო. ორივე მხრის სახსარსა და წინამხრებში მას ჩაკრას მიმღებები ჰქონდა გაყრილი. მის შუბლსაკრავზე ამეგაკურეს სიმბოლო ჰანზოს რეჟიმის დამხობის ნიშნად იყო გადახაზული. ნაგატო აკაცუკის ერთადერთი წევრი იყო, რომელიც ორგანიზაციის უნიფორმას არ ატარებდა. სიკვდილის წინ, ზეციური სიცოცოხლის სამსარას გამოყენების შედეგად, ჩაკრას გადაჭარბებულად მოხმარების გამო, ნაგატოს წითელი თმა გათეთრდება. რეინკარნაციის შემდეგ მას კვლავინდებურად შეზღუდული შესაძლებლობები და თეთრი თმა ექნება, თუმცა რვაკუდიანის ჩაკრას შთანთქმის გზით იგი სხეულს გაიჯანსაღებს და ჯანმრთელი ადამიანის იერს დაიბრუნებს.

avto-itachi

კაი,
და ზოროსთან ან მუგივარებთან?